Një 24-vjeçar shqiptar ka humbur jetën pas një sulmi me thikë në Vescovato, në provincën e Cremonës, Itali. Ngjarja dyshohet të ketë ndodhur pas një sherri mes disa të rinjve.
Sipas mediave italiane, viktima, i identifikuar me inicialet N. Dalipaj, është goditur të paktën tri herë në pjesën e qafës. Ai u transportua në gjendje të rëndë në spital, por nuk arriti t’u mbijetonte plagëve.
Lidhur me ngjarjen, autoritetet italiane kanë ndaluar një 32-vjeçar, Mattia Miraglia, banues në Vescovato. Edhe ai ka mbetur i plagosur gjatë përleshjes dhe ndodhet nën kujdesin e mjekëve në spitalin “Maggiore” të Cremonës.
Sipas hetimeve paraprake të karabinierëve, konflikti dyshohet të ketë nisur për motive banale, të lidhura me xhelozinë për një vajzë. Raportohet se fillimisht mes dy personave ka pasur një debat në një lokal, i cili më pas ka degraduar në përplasje fizike dhe përdorim të armës së ftohtë.
Autoritetet italiane vijojnë hetimet për të zbardhur plotësisht rrethanat dhe dinamikën e ngjarjes.