Përplasja verbale mes gazetarit Konomi dhe kryeministrit Edi Rama në Vuno ka vijuar me publikimin e versioneve të ndryshme të palëve për atë që ndodhi gjatë incidentit.
Një ditë më parë, Konomi publikoi një video ku tregonte se debati kishte nisur pasi kishte konstatuar disa automjete të eskortës së kryeministrit të parkuara në një zonë ku, sipas tij, sinjalistika rrugore nuk e lejonte një gjë të tillë.
Gazetari tha se kishte nxjerrë telefonin për të dokumentuar situatën dhe kishte kërkuar shpjegime se përse policia nuk po ndërhynte për të vendosur gjoba ndaj automjeteve.
Sipas rrëfimit të Konomit, gjatë këtij momenti ai është afruar edhe pranë kryeministrit. Gazetari pretendon se Rama i ka kërkuar disa herë që të ulej, ndërsa mes tyre ka vijuar një shkëmbim replikash.
Në debat, sipas Konomit, është përfshirë edhe bashkëshortja e kryeministrit, Linda Rama. Gazetari ka pretenduar se në një moment i është drejtuar Ramës duke i ofruar disa fiq që kishte me vete, ndërsa më pas ka marrë një përgjigje fyese nga Linda Rama.
“Po të jap disa fiq, nuk i kam për ty, po meqë m’u gjendën”, pretendon Konomi se i është drejtuar kryeministrit.
Një ditë pas deklaratave të gazetarit, Rama ka publikuar pamje nga momenti i përplasjes, duke paraqitur versionin e tij mbi episodin.
Në videon e publikuar nga kryeministri dëgjohet Konomi teksa e pyet atë për parkimin e automjeteve dhe kërkon ndërhyrjen e policisë.
“Përse keni parkuar kundër tabelës, kryeministër? Ku është policia të të vërë gjobë? Do ca fiq?”, dëgjohet të thotë gazetari.
Publikimi i pamjeve nga Rama ka sjellë kështu një tjetër version të episodit, pas pretendimeve të ngritura një ditë më parë nga Konomi për mënyrën se si kishte nisur dhe ishte zhvilluar debati në Vuno.
Kryeministri përbri videos shkruan: “Ja që për fat të mirë ka edhe një video tjetër, e cila tregon krejt të kundërtën e videos që një dhunues i lirisë së të tjerëve paska vrapuar të tregojë botërisht, duke bërë para pasqyrës së tij viktimën e dhunuar, duke shfrenuar fantazinë dhe duke sharë si i përdalë një grua e një nënë, të cilën e bullizoi bashkë me fëmijën e saj në mes të rrugës, ku ngjarja u zhvillua krejt ndryshe nga rrëfimi në pasqyrë dhe u përhap pastaj në kanalet sociale si një tjetër gënjeshtër e madhe e luftës liridashëse kundër regjimit imagjinar. Fatmirësisht këtë herë ka një video demaskuese të gënjeshtrës, po imagjinojeni se sa herë të tjera gënjeshtra bën kërdinë mbi të vërtetën nëpër pasqyrat ku kujtojmë se informohemi”, shkruan Rama.
Konomi pretendon gjithashtu se pas debatit kanë ndërhyrë katër truproje, të cilët i kanë marrë telefonin dhe se më pas ai është shoqëruar me furgon policie në komisariat.
“Sapo kam dalë nga biruca e komisariatit të Himarës, pas një përplasje me kryeministrin Rama këtu në Vuno. Në mëngjes policia gjobit banorët atje ku ka tabela dhe ku nuk ka…”, ka deklaruar Konomi.
