E dini djemtë e kujt janë? Nëna e tyre është një prej këngëtareve më të famshme në botë, gjatë sëmundjes ata u bënë mbështetja e saj më e madhe
Në pamje të parë, jo të gjithë mund t’i njohin dy djemtë në fotografi. Por nëna e tyre është një prej zërave më të njohur të muzikës botërore: Céline Dion.
Bëhet fjalë për binjakët Nelson dhe Eddy Angélil, djemtë më të vegjël të këngëtares së famshme, të cilët nga fëmijët që dikur shfaqeshin herë pas here pranë së ëmës, tashmë janë rritur dhe kanë ndryshuar shumë.
Binjakët janë 15 vjeç dhe më 23 tetor do të mbushin 16. Daljet e tyre publike kanë qenë të rralla, ndaj shfaqja e fundit pranë nënës së tyre në Paris tërhoqi menjëherë vëmendjen. Céline Dion mbërriti në kryeqytetin francez me tre djemtë e saj, ndërsa përgatitet për rikthimin e madh në skenë, raporton noa.al duke cituar Madame Figaro.
Nelson dhe Eddy kanë lindur më 23 tetor 2010 në Florida. Ardhja e tyre në jetë nuk ishte e lehtë për Céline Dion dhe bashkëshortin e saj të ndjerë, René Angélil, pasi çifti kaloi nëpër disa përpjekje për fekondim të asistuar.
Emrat e binjakëve lidhen me njerëz të rëndësishëm për familjen. Eddy mori emrin e producentit dhe autorit francez Eddy Marnay, i cili luajti një rol të rëndësishëm në fillimet e karrierës së Céline Dion, ndërsa Nelson u quajt në nder të Nelson Mandelës.
Ata janë më të vegjlit nga tre djemtë e këngëtares. Vëllai i tyre i madh, René-Charles Angélil, është 25 vjeç.
Humbën të atin kur ishin vetëm pesë vjeç
Nelson dhe Eddy ishin vetëm pesë vjeç kur babai i tyre, René Angélil, ndërroi jetë në vitin 2016 pas një beteje me kancerin.
Pas humbjes së bashkëshortit, Céline Dion vazhdoi e vetme kujdesin për familjen, por disa vite më vonë do të përballej me një tjetër periudhë tepër të vështirë.
Në vitin 2022, këngëtarja bëri të ditur se ishte diagnostikuar me sindromën e personit të ngurtë, një sëmundje e rrallë neurologjike që shkakton ngurtësim të muskujve dhe spazma të dhimbshme dhe që ndikoi rëndë në aftësinë e saj për të lëvizur dhe kënduar.
Djemtë mësuan si ta ndihmonin nënën në rast krize
Me përkeqësimin e gjendjes shëndetësore të këngëtares, Nelson dhe Eddy u gjendën përballë një përgjegjësie të pazakontë për moshën e tyre.
Céline Dion ka treguar se djemtë, së bashku me të dhe fizioterapistin e saj, kanë mësuar se si duhet të veprojnë nëse ajo pëson një krizë shëndetësore.
Në shtëpi janë vendosur edhe butona për raste urgjence, ndërsa binjakët dinë se si ta kthejnë nënën e tyre në anë kur gjendja e saj e kërkon. Familja zhvillon herë pas here edhe prova se si duhet të veprojnë në raste të tilla.
Për këngëtaren ka qenë e rëndësishme që djemtë të kuptonin çfarë po i ndodhte, në vend që të jetonin me frikën e së panjohurës.
Me kalimin e viteve, ata e kanë kuptuar se nëna e tyre nuk mund të bëjë gjithmonë gjërat që bënte më parë dhe se në disa çaste ka nevojë edhe për ndihmën e tyre.
Dhe pikërisht këtu marrëdhënia e tyre merr një kuptim të veçantë: djemtë që dikur mbështeteshin për gjithçka te nëna e tyre, sot janë ndër njerëzit që e mbështesin më shumë atë.
Céline Dion ndodhet aktualisht në Paris, ku po përgatitet për rikthimin e saj në koncerte pas viteve të vështira të shënuara nga sëmundja.
