Vjeshta duket se po vonon të marrë vendin e verës në Shqipëri.
Temperaturat do të vijojnë të jenë të larta edhe gjatë ditëve në vijim, ndërsa reshjet e parashikuara nuk pritet të sjellin rënien e fortë të temperaturave që zakonisht shoqëron shirat e parë të shtatorit.
Në këtë situatë, krahas motit të nxehtë, mbetet shqetësues edhe rreziku për përhapjen e zjarreve në pyje.
Për të kuptuar më mirë se çfarë pritet gjatë ditëve në vijim, në një lidhje direkte për Ora News është Anira Gjoni nga Instituti i Gjeoshkencave.
Sipas parashikimeve, temperaturat do të arrijnë deri në 33-34 gradë Celsius, duke mbetur të larta për javën e dytë të shtatorit. Rënia e tyre do të jetë graduale dhe nuk pritet një ndryshim i menjëhershëm i situatës së motit.
“Pra, nuk shohim që të kemi intensitete të shtuara përgjatë këtyre ditëve. Sërish temperaturat do të vijojnë me një ulje, pra, të vogël, por janë sërish të larta.”-tha Gjoni.
Reshjet që priten në disa zona nuk do të jenë të mjaftueshme për të sjellë një kthesë të menjëhershme të motit.
Ato parashikohen kryesisht lokale, ndaj ndikimi i tyre do të ndryshojë nga një zonë në tjetrën.
Një nga problematikat kryesore mbetet rreziku nga zjarret.
Temperaturat e larta, të kombinuara me erën, krijojnë kushte që favorizojnë përhapjen e flakëve.
Sipas të dhënave të IGJEO-s, pjesa më e madhe e territorit vijon të jetë në nivel të lartë rreziku.
Për Kukësin dhe Korçën, niveli i përgjithshëm parashikohet të jetë më i moderuar, por edhe në këto dy qarqe ka zona ku rreziku mund të jetë i lartë. Pra, reshjet nuk e heqin automatikisht rrezikun, sidomos në zonat ku terreni mbetet i thatë dhe ku ka vatra aktive.
“Pas kësaj jave nuk presim që të kemi ulje drastike të temperaturave. Do të ketë një rënie graduale të tyre, por sërish kjo javë mbetet në vlera të larta, pasi vlerat 33, 34 gradë sërish shënojnë vlera të larta sa i takon javës së dytë të shtatorit. Ajo që mbetet në fokus është se, duke qenë se vijojnë temperaturat e larta, do të kemi edhe prezencën e erës dhe vijon të mbetet i lartë rreziku për zjarre në pyje.”-u shpreh ajo.
Në ditët në vijim pritet një kombinim i temperaturave ende të larta, reshjeve lokale dhe erës. Kjo do të thotë se nuk pritet ende kalimi i menjëhershëm drejt një moti tipik vjeshtor.
Ndërkohë, autoritetet vijojnë të monitorojnë situatën e zjarreve në territor. Vetëm gjatë 24 orëve të fundit janë raportuar 44 vatra zjarri në vend, 14 prej të cilave vijonin aktive dhe 9 ishin nën monitorim, sipas të dhënave të raportuara nga Ministria e Mbrojtjes.