Një atentat me armë zjarri ka tronditur sot qendrën e qytetit të Sarandës, ku ka mbetur i vrarë 44-vjeçari Artan Myrtaj, i njohur ndryshe me nofkën “Tani Ruzhdiut”. Nga të shtënat e njëpasnjëshme ka mbetur i plagosur edhe një kalimtar rasti, i identifikuar si shtetasi Xhevdet Skëndaj, i cili është dërguar me urgjencë për ndihmë mjekësore. Ngjarja e rëndë është kryer nga dy persona të maskuar, të cilët i janë afruar viktimës të hipur mbi një motocikletë dhe më pas janë larguar me shpejtësi.
Artan Myrtaj, 44-vjeçari që u ekzekutua mëngjesin e sotëm me armë zjarri në qendër të Sarandës, ishte një emër i njohur për organet e drejtësisë dhe rendit publik. I njohur në zonë me nofkën “Tani Ruzhdiut”, Myrtaj rezultonte me precedentë të mëparshëm penalë, midis të cilëve dënime për veprën penale të vjedhjes, si dhe njihej si përdorues i lëndëve narkotike.
Emri i 44-vjeçarit lidhej ngushtë me një nga ngjarjet më të rënda kriminale të ndodhura në qytetin bregdetar më 17 korrik 2025. Në atë kohë, në lagjen nr. 4 të Sarandës, mbetën të plagosur me armë zjarri dy persona nga Kamza, Ernest Lama dhe Gëzim Hajdaraj. Autori i shpallur i atij sulmi ishte shtetasi Ramadan Zoto, ndërsa Artan Myrtaj, së bashku me Klaus Jaçajn dhe Erjon Canajn, e ndihmuan autoren gjatë ngjarjes dhe e mbështetën për t’iu shmangur kapjes nga policia.
Kjo përplasje shërbeu si pikënisje për një varg ngjarjesh hakmarrëse në Sarandë, mes të cilave vrasja me eksploziv tritol e Isuf Jaçajt (babait të Klaus Jaçajt) dhe shkatërrimi i pronës së Ramadan Zotos. Së fundmi, dënimi për atë ngjarje po vuhej nga Ramadan Zoto në burg, ndërsa Artan Myrtaj dhe Klaus Jaçaj — të akuzuar vetëm për “përkrahje të autorit të krimit” — kishin lënë qelinë dhe kishin fituar lirinë pak kohë më parë.