Autoriteti Rrugor Shqiptar ka njoftuar bllokime të përkohshme të qarkullimit në autostradën Tiranë-Durrës për shkak të fazës së tretë të punimeve për zgjerimin e autostradës.
Në një postim në rrjetet sociale ARRSH bën të ditur se mbrëmjen e 21 shtatorit, nga ora 23:00 deri në 05:00, do të bllokohet qarkullimi në drejtimin Tiranë-Durrës. Trafiku do të devijohet përmes rampës së Rinasit dhe rrugëve dytësore, ndërsa mjetet e rënda do të orientohen që nga rrethrrotullimi i “Casa Italia”.
Ndërkohë, më 22 shtator, në të njëjtin interval kohor, do të bllokohet drejtimi Durrës-Tiranë. Mjetet do të devijohen përmes mbikalimit Kashar-Thumanë dhe rrugëve dytësore, ndërsa automjetet me destinacion Rinasin, Shkodrën dhe Kosovën do të orientohen sipas sinjalistikës përkatëse.
ARRSH bën apel për mirëkuptim dhe bashkëpunim nga drejtuesit e mjeteve, bizneset dhe banorët e zonës, duke rekomanduar planifikimin paraprak të itinerareve dhe shmangien e këtij segmenti gjatë orëve të punimeve.
NJOFTIM I ARRSH
Në kuadër të vijimit të punimeve për realizimin e projektit “Zgjerimi i Superstradës Tiranë–Durrës (Faza III)”, dhe në zbatim të Planit të Menaxhimit të Trafikut, do të kryhen punime për montimin e trarëve tërthorë në hapësirën e mesit të mbikalimit.
Për realizimin e sigurt të këtyre punimeve, sot në datën datë 21 shtator, nga ora 23:00 deri në 05:00, do të bllokohet përkohësisht qarkullimi në drejtimin Tiranë–Durrës.
Trafiku do të devijohet nëpërmjet rampës në drejtim të Rinasit dhe më pas do të vijojë në rrugën dytësore nga ku mund të futen sërisht në superstradë nëpërmjet rrugës së Rinasit dhe rampës së saj me drjetim Durrësin.
Për mjetet e rënda, veçanërisht kamionët, devijimi nevojitet të bëhet që nga rrethrrotullimi i “Casa Italia”, në mënyrë që të shmanget përdorimi dhe dëmtimi i rampës provizore së Rinasit.
Në datën 22 shtator, nga ora 23:00 deri në 05:00, do të bllokohet përkohësisht qarkullimi në drejtimin Durrës–Tiranë.
Trafiku do të devijohet nëpërmjet mbikalimit Kashar–Thumanë, duke vijuar në rrugën dytësore në anën e majtë deri pas mbikalimit të Kasharit, ku do të rikthehet në autostradë në drejtim të Tiranës.
Mjetet me destinacion Rinas, Shkodër dhe Kosovë: do të sinjalizohen dhe orientohen që në Mbikalimin e autostradës Kashar–Thumanë për të vijuar në drejtimin përkatës.
Gjatë periudhave të bllokimit, trafiku do të devijohet në rrugët dytësore në të dyja anët e superstradës, në përputhje me sinjalistikën dhe masat e përcaktuara në Planin e Menaxhimit të Trafikut.
ARRSH kërkon mirëkuptimin dhe bashkëpunimin e drejtuesve të mjeteve, bizneseve dhe banorëve të zonës për kufizimet e përkohshme të qarkullimit.
U rekomandohet drejtuesve të mjeteve të planifikojnë paraprakisht itinerarin e tyre dhe të shmangin, sa të jetë e mundur, qarkullimin në këtë segment gjatë intervalit kohor të punimeve.