Blerina Matraku ka reaguar sërish pas publikimit në internet të pamjeve intime ku ajo shfaqet së bashku me kompozitorin Ardian Hila, duke folur për pasojat që kjo ngjarje, sipas saj, ka shkaktuar në jetën personale dhe profesionale.
Përmes një deklarate të gjatë në rrjetet sociale, këngëtarja ka drejtuar akuza të forta ndaj Hilës, duke kërkuar që ai të mbajë përgjegjësi për dëmin që ajo pretendon se i është shkaktuar asaj dhe familjarëve të saj.
Matraku shprehet se çdo lot dhe çdo dhimbje e përjetuar si pasojë e kësaj historie duhet të ketë një përgjegjës.
Në rrëfimin e saj, këngëtarja ndalet gjithashtu te raporti që kishte me kompozitorin. Sipas versionit të saj, Hila i ishte prezantuar si një person i ndarë nga bashkëshortja, Klaudia.
Një tjetër pikë që Matraku kërkon të sqarojë lidhet me bashkëpunimin e tyre profesional.
Ajo pretendon se këngët e realizuara nga Hila nuk i janë ofruar falas, por janë paguar prej saj. Matraku tregon se për të përballuar jetesën dhe shpenzimet e lidhura me muzikën i është dashur në periudha të caktuara të punojë në tri vende njëkohësisht.
Por sipas këngëtares, dëmi më i madh i shkaktuar nga publikimi i materialeve private nuk është financiar.
Ajo thotë se ndihet e cenuar në dinjitetin dhe jetën e saj private, ndërsa situata ka ndikuar rëndë edhe në mënyrën se si e sheh vazhdimin e karrierës artistike.
Matraku ngre madje pikëpyetje nëse do të jetë në gjendje të rikthehet normalisht në skenë pas ekspozimit publik të momenteve të saj intime.
Sipas saj, pasojat e kësaj historie nuk përfundojnë me reagimet e momentit në rrjetet sociale, por mund ta shoqërojnë për një kohë të gjatë si në jetën personale, ashtu edhe në atë profesionale.
Reagimi i Matrakut vjen ndërsa publikimi dhe shpërndarja e pamjeve intime vazhdon të jetë objekt diskutimi publik. Pretendimet e saj ndaj Ardian Hilës përfaqësojnë versionin e këngëtares për ngjarjen dhe nuk duhen interpretuar si përfundime të një procesi hetimor apo gjyqësor.
REAGIMI I PLOTË
Të bësh një vajzë që të mos e shohë dot babain e saj në sy, ta bësh atë të ikë nga shtëpia e të humbasë të vetmen gjë që ka mbetur në jetë, “dinjitetin”, ky është KRIM.
Të kam mbivlerësuar e hiperbolizuar, por nuk ta fal. Do t’i lë në këtë botë lotët e çdo gruaje apo vajze, o Zot, lotët e çdo fëmije, lotët e nënës time, të Klaudias, (për të cilën thoje “jam i divorcuar”), lotët e vajzave të tua (ju lutem, më falni sërish ju të fundit, se nuk e mbroj dot më këtë njeri).
Do paguash lotët e mi që nuk ndalen, sepse ti nuk di të ndalesh, nuk ke kufij, ke kaluar çdo cak njerëzor e mbarëdimensional.
Unë nuk kam vuajtur kurrë për emër, nuk jam këngëtarja e studios tënde, unë të kam paguar me gjak për çdo këngë e projekt, nuk jam pjesë e fondeve bashkiake apo të asnjë privilegji shtetëror. Jam këngëtarja e papaguar dhe e pavlerësuar me çmime, më e pambrojtura, e cila e ka gjetur punën me thonj, dy-tre punë të lodhshme. Nëse njerëzit punojnë 8 orë, unë kam punuar 20 orë nëpër shërbim klienti (qofshin të nderuar), kam lënë sytë nëpër përkthime, duke kërkuar një punë të tretë, rraskapitëse, për të përballuar jetën e Tiranës… SOS.
Kërkoj nga autoritetet shtetërore të merren masa ligjore për secilin që ka përdhosur figurën e dikujt, të një fëmije, të një artisteje të pambrojtur…
Shteti im i dashur, çështja ka marrë përmasa dhe unë nuk jam më ajo Blerina që mund të punojë me mund 24/24. Imazhi im është përdhosur dhe unë nuk kam sy e faqe të dal para asnjë individi, para asnjë familjari e para askujt.
Ju lutem, ndalni këtë gjë të shëmtuar, ku po goditen njerëz të pafajshëm. Familja ime është e gjunjëzuar dhe unë jam një njeri i kryqëzuar. Kjo gjë do të dënohet e le të ndiqet nga kompetencat ligjore.
Më lini vetëm pak sa të marr veten, për të raportuar apo proceduar. Ndjesë, situata është tragjikeee.