Detaje të tjera me të rënda janë zbardhur lidhur me vrasjen e 39-vjeçares shqiptare Meleqe Lusha nga djali i saj 21-vjeçar, Eduart Xhani, ngjarje e shënuar në qytetin Chiari të provincës së Brescias në Itali.
Pas krimit tragjik ku i shkaktoi të ëmës rreth dhjetë plagë me thikë në pjesën e sipërme të trupit gjatë orëve të natës, i riu është endur pa synim për disa orë në rrugët e zonës. Më pas, ai është paraqitur vullnetarisht me rroba të gjakosura në një kazermë të Karabinierëve në Cremona.
“E kam vrarë nënën time, do ta gjeni në shtëpi”, ka qenë deklarata e shkurtër e 21-vjeçarit përpara ushtarakëve, përpara se të mbyllej në heshtje të plotë përballë pyetjeve të hetuesve. Prokurorja e gatshme e Brescias, Laura Matrone, ka nxjerrë menjëherë urdhrin e ndalimit ndaj tij, duke urdhëruar transferimin në burgun Canton Mombello.
Ngjarja e rëndë ka tronditur thellë komunitetin vendas dhe atë shqiptar në Itali, ku familja njihej si e integruar dhe pa probleme të mëparshme. Dennis Beqiri, president i Shoqatës së Shqiptarëve në Chiari dhe pronar i agjencisë imobiliare ku i riu kishte kryer stazhin e shkollës, ka dhënë një dëshmi prekëse mbi figurën e 21-vjeçarit.
“Eduarti ishte një djalë shumë i mirë, i edukuar dhe serioz. Ishte shembull për komunitetin. Gjithmonë vinte në kohë, ishte i buzëqeshur dhe korrekt. Isha i bindur se do të kishte një të ardhme të suksesshme”, deklaroi Beqiri.
Ekspertët e Karabinierëve po vazhdojnë këqyrjen e imtësishme të apartamentit ku bashkëjetonin nëna me djalin për të përcaktuar dinamikën e plotë të ngjarjes, ndërsa motivi që e çoi të riun drejt këtij veprimi makabër mbetet ende plotësisht i paqartë.