4 turistë rusë Natalia Burenkova, 58 vjeçe, Sergei Burenkov, 60 vjeç, Nikita Belousov, 37 vjeç, Ekaterina Burenkova, 31 vjeçe, humben jeten në sauna të një hoteli në Qerret të Kavajës. Turistët janë gjetur nga recepsionisti i hotelit.
Nga dëshmitë e tij mesohet se ai ka shkuar në dhomën e tyre pasi kishin porositur pije. Duke qenë se ata nuk i janë përgjigjur kur i ka rënë derës, recepsionisti tregon se është futur brenda dhomës dhe i ka gjetur të pajete. Menjëherë më pas ka njoftuar policinë.
“Kaluan tek recepsioni dhe porositën pije. Pas disa minutash shkova tu çoja porosinë. I rash derës, nuk u përgjigj njeri. U futa brenda dhe i pashë që ishin pa shenja jete. Dola me vrap dhe lajmërova të tjerët”, ka thënë ai më tej në dëshminë e tij.
Burime nga Prokuroria e Kavajës thonë se hetimet po kryhen në dy drejtime për rastin. Instituti i Mjekësisë Ligjore po kryen ekspertizën e trupave të pajetë për të zbardhur shkakun. Paralelisht po zhvillohet edhe ekspertiza për analizat bakteriologjike të ambienteve të saunës së hotelit. Dyshohet se turistët kanë humbur jetën për shkak të temperaturës së lartë, e cila ul tensionin dhe si pasojë edhe sasinë e oksigjenit në gjak.
