Kursi i këmbimit të Lekut ndaj Euros po reflekton gjithnjë e më fort efektet sezonale të sezonit veror. Shtimi i fluksit të turistëve dhe emigrantëve ka rritur ndjeshëm ofertën për valutë në tregun shqiptar, duke ushtruar një presion të pashembullt mbi rënien e monedhës së përbashkët europiane.
Sipas kursit zyrtar të publikuar sot nga Banka e Shqipërisë, një Euro u këmbye me 93.78 lekë, duke u nënçmuar me 0.11 lekë krahasuar me ditën e mëparshme. Ky përben nivelin më të ulët historik të regjistruar ndonjëherë në vendin tonë. Në raport me fillimin e këtij viti, Euro është nënçmuar me 3.04%, ose me gati 3 lekë më pak.
Ecuria e kursit dhe krahasimi afatgjatë
Rënia e monedhës europiane bëhet akoma më e dukshme nëse analizohen mesataret e viteve të fundit:
Mesatarja Janar – Korrik 2026: Një euro është këmbyer mesatarisht me 95.7 lekë.
Mesatarja e vitit 2025: Kursi mesatar ishte në nivelin 97.8 lekë.
Krahasimi me vitin 2015: Krahasuar me një dekadë më parë, kur Euro këmbehej mesatarisht me 139.7 lekë, monedha e përbashkët ka pësuar një zhvlerësim drastik prej 31.5% (rreth 44 lekë më pak).
Faktorët që po zhvlerësojnë Euron
Aktorët e tregut valutor pohojnë se forcimi i pashpjegueshëm i Lekut lidhet me një kombinim faktorësh afatgjatë dhe sezonalë. Së pari, fluksi i parave informale që hyri në vend pas vitit 2016 u kanalizua masivisht në sektorin e ndërtimit.
Së dyti, pas vitit 2022, peshën kryesore e morën të ardhurat e gjeneruara nga turizmi, ku vetëm gjatë vitit 2025 hyrjet e shtetasve të huaj në Shqipëri kaluan shifrën e 12 milionë personave. Rënia e ditëve të fundit i faturohet ekskluzivisht prurjeve të mëdha valutore që sjellin turistët gjatë pikut të sezonit veror.
Fituesit dhe humbësit e kursit të ri
Kush dëmtohet: Nënçmimi galopant i Euros ka goditur rëndë sektorin e eksporteve dhe operatorët turistikë, të cilët i sigurojnë të ardhurat në valutë por shpenzimet i kanë në Lekë. Një tjetër goditje po marrin edhe familjet e emigrantëve, të cilave u ka rënë ndjeshëm vlera e remitancave në tregun vendas.
Kush përfiton: Në kahun tjetër, situata është pozitive për importuesit e mallrave, të cilëve u duhen më pak Lekë për të blerë të njëjtën sasi produktesh jashtë vendit. Përfitues direkt mbeten edhe qytetarët shqiptarë që udhëtojnë jashtë për pushime, si dhe Buxheti i Shtetit, që harxhon më pak fonde për të paguar shërbimin e borxhit të jashtëm.